Si en toy luit le flambeau gracieux,
Flambeau d'Amour, qui tout gent cœur allume,
Comme il faisoit lors, qu'à ta docte plume
Tu feis hausser le vol jusques aux cieux :
Donne, sans plus, une heure à tes deux yeux
Pour voir l'ardeur, qui me brusle et consume
En ces erreurs, qu'Amour sur son enclume
Me fait forger, de travail ocieux.
Tu y pourras recognoistre la flame,
Qui enflama si hautement ton ame,
Mais non les traits de ta divine veine.
Aussi je prens le blasme en patience,
Prest d'endurer honteuse pénitence,
Pour les erreurs de ma jeunesse vaine.
Poème publié et mis à jour le: 15 November 2012