« LI CRESTIIEN PAROLENT
Sainz Sepulcres, aie! Seignor, or del bien faire!
Sarrazin et paien vienent po¨r nos forfaire.
Vez les armes reluire : toz li cuers m'en esclaire.
Or le faisons si bien que no proece i paire.
Contre chascun des noz sont bien cent par devise.
UNS CRESTIIENS
Seignor, n'en dotez ja : vez ci nostre juïse
Bien sai tuit i morrons et Damedieu servise;
Mais mout bien m'i vendrai, se m'espee ne brise
Ja n'en garira un ne coife ne haubers.
Seignor, et Dieu servise soit ui chascuns oferz
Paradis sera nostre et eus sera enferz.
Gardez a l'assembler qu'il encontrent noz fers.
UNS CRESTIIENS NOVEAUS CHEVALIERS
Seignor, se je sui juenes, ne m'aiez en despit!
On a veü sovent grant cuer en cors petit.
Je ferrai tel forçor, je l'ai piece a eslit
Sachiez je l'ocirai s'il ainçois ne m'ocit.
LI ANGES
Seignor, soiez tuit asseür
N'aiez dotance ne peür.
Messagiers sui Nostre Seignor,
Qui vos metra fors de dolor.
Aiez, voz cuers fers et creanz
En Dieu; ja por cez mescreanz
Qui ci vos vienent a bandon
N'aiez les cuers se seürs non.
Metez hardiëment voz cors
Por Dieu, car ce est ci la morz
Dont toz li pueples morir doit
Qui Dieu aime de cuer et croit.
UNS CRESTIIENS
Qui estes vos, beaus sire, qui si nos confortez,
Et si haute parole de Dieu nos aportez
Sachiez se ce est voir que ci nos recordez,
Asseür recevrons noz enemis mortes.
LI ANGES
Anges sui a Dieu, beaus amis
Por vo confort m'a ci tramis.
Soiez seür, car enz es cieus
Vos a Dieu fait sieges eslieus.
Alez! Bien avez comencié
Por Dieu serez tuit detrenchié,
Mais la haute corone aurez.
Je m'en vois. A Dieu demorez!
LI ANGES
A! chevalier qui ci gisiez,
Con par estes boneüré!
Come, or cez ores, despisiez
Le mont ou tant avez duré!
Mais por le mal qu'eü avez,
Mien escient, trés bien savez
Queus biens ce est de paradis,
Ou Dieus met toz les siens amis.
A vos bien prendre garde doit
Toz li monz, et ensi morir;
Car Dieus mout doucement reçoit
Ceus qui o lui vuelent venir.
Qui de bon cuer le servira
Ja sa peine ne perdera,
Ainz sera es cieus coronez
De tel corone come avez. »
Poème publié et mis à jour le: 08 June 2019