Belle qui tiens ma vie

Belle qui tiens ma vie
Captiue dans tes yeulx,
Qui m’a l’ame rauie
D’un ſoubz-ris gracieux,
Viens toſt me ſecourir
Ou me fauldra mourir.

Pourquoy fuis tu mignarde
Si ie ſuis pres de toy,
Quand tes yeulx ie regarde
Ie me perd dedans moy
Car tes perfections
Changent mes actions.

Tes beautéz & ta grace
Et tes diuins propos.
Ont eſchauffé la glace
Qui me geloit les os,
Et ont remply mon cœur
D’une amoureuſe ardeur.

Mon ame ſouloit eſtre
Libre de paſsions,
Mais amour s’eſt faict maiſtre
De mes affections,
Et à mis ſoubs ſa loy
Et mon cœur & ma foy.

Approche donc ma belle
Approche toy mon bien,
Ne me ſois plus rebelle
Puis que mon cœur eſt tien,
Pour mon mal appaiſer,
Donne moy un baiſer.

Ie meurs mon Angelette
Ie meurs en te baiſant,
Ta bouche tant doucette
Va mon bien rauiſſant
À ce coup mes eſpritz
Sont tous d’amour eſpris.

Pluſtoſt on verra l’Onde
Contre mont reculer
Et pluſtoſt l’œil du monde
Ceſſera de bruſler,
Que l’amour qui m’époinct
Decroiſſe d’un ſeul poinct.